Archive pour mai, 2017

IVYOKURYA VYO MU GITONDO (162).

IVYOKURYA VYO MU GITONDO (162) Ubutumwa bwiza bwanditswe na Luka (101)
Image result for je me tiens a la porte et je frappe
Ehe mpagaze ku rugi, ndaramukije (Ivyahishuwe 3: 20)
WEWE KO UVUGA NGO URAZI YESU, UBWO YESU ARAKUZI?
Ari mu nzira, ahita mu bisagara no mu mihana, yigisha, ari ku rugendo aja i Yerusalemu. Umuntu aramubaza ati: « Mugenzi, mbega abakizwa ni bake? » Na we arababarira24ati: « Mushishikare guca mw’irembo ripfunganye. Ndababwira yuko benshi bazogomba kuricamwo, ntibabishobore. » Nyene inzu ni yaheza guhaguruka, akugara urugi, mugatangura gukomanga muhagaze hanze, muvuga muti Mupfasoni n’utwugururire. Ni ho azovuga ati Simbazi, sinzi n’iyo muvuye. Ni ho muzotangura kuvuga ko mwarira, mwanywera imbere yiwe kandi yigishiriza mu nzira z’i wanyu. Azobabwira ati: « Ndababwire, sinzi iyo muvuye; mviraho, mwebwe mwese mwabakora ibizira mwe. » Aho ni ho hazoba amarira no kuryanya insya z’amenyo, aho muzobonera Aburahamu, Isaka, Yakobo n’abavugishwa n’Imana bose bari mu bwami bw’Imana, namwe muhindiwe hanze. Hazoza abava mu buseruko, mu burengero, mu buraruko no mu bumanuko, bazokwicara mu bwami bw’Imana. Kandi hari abo inyuma bazoba abo imbere, n’abo imbere bazoba abo inyuma (Luka 13: 22-30)
Wewe uvuga ko uzi Yesu, ubwo Yesu arakuzi koko? Mur’iki cigisho muri kumwe n’umunyavyaha yagiriw’ubuntu nkamwe, akaba na mwene So musangiye intambara yo kwizera no kwihangana mur’ibi bihe vy’iherezo: Balthasar Miburo
Ari mu nzira, ahita mu bisagara no mu mihana, yigisha, ari ku rugendo aja i Yerusalemu. Uru rugendo nirwo rwa nyuma Yesu yagize aja i Yerusaremu, yarurangirije ku musaraba i Gologota, inyuma y’igisagara c’i Yerusaremu. Aho niho yabambwe, azira ukuntu wewe na jewe twica amategeko y’Imana, nivyo twita ibicumuro, canke ivyaha. “ Ni co catumye na Yesu ababarizwa inyuma y’irembo, kugira ngo yezeshe abantu amaraso yawe. Nuko tuve muri ayo mahema, tumusange inyuma yayo, twiremetse ugucokorwa kwiwe (Abaheburayo 13: 12-13)
Umuntu aramubaza ati: « Mugenzi, mbega abakizwa ni bake? » Na we arababarira ati: « Mushishikare guca mw’irembo ripfunganye. Ndababwira yuko benshi bazogomba kuricamwo, ntibabishobore (Luka 13: 23-24). Uwu muntu yabajije iki kibazo, asa naho nawe nyene atizera ko azokizwa. Igisubizo Yesu yamuhaye, kirerekana ko yamuteye intege zo kwinjira mu bategerezwa gushishikara kwinjira mw’irembo rifunganye. Dukwiye kuva muvyo abantu bavuga, tugafata igihe gikwiye co kwumvira ijwi rya Yesu, naho vyosaba ko dukurwa mu kazi canke mw’ishule, mbere n’ubwo vyosaba ko twicwa. “ Abo nkunda bose ndabakankamira, nkabakangira; nuko gira umwete, wihane. Ehe mpagaze ku rugi, ndaramukije. Umuntu ni yumva ijwi ryanje, akugurura umwango, ndinjira i we, dusangire. Uwunesha, nzomuha kwicarana nanje ku ntebe yanje y’ubwami, nk’uko nanje nanesheje nkicarana na Data ku ntebe yiwe. Uwuri n’ugutwi, ni yumve ico Mpwemu abwira amashengero. » (Ivyahishuwe 3: 19-22)
Kuko igihe gishobora kuturengana tudashoboye kuryinjiramwo. Ntirizokwama ripfunguye. Kandi n’ubu naho ripfunguye, kuryinjiramwo bisaba ubutwari duhabwa n’ukwizera kuva mu nkomezi zo mu maraso ya Yesu yamenetse ku musaraba i Gologota. “ Ni twatura ivyaha vyacu, ni yo yo kwizigirwa kandi igororoka, ivyo ni vyo bituma iduharira ivyaha vyacu, ikatwoza ukugabitanya kwose. Tuvuze yuko ata caha twakoze, tuba tuyigize umubeshi, kandi n’ijambo ryayo riba ritari muri twebwe. Bana banje bato, ndabandikiye ivyo kugira ngo ntimukore icaha. Kandi ni hagira umuntu akora icaha, dufise Umwitsa kuri Data wa twese, ni Yesu Kristo umugororotsi, kandi uwo ni we ndishi y’ivyaha vyacu, mugabo si iyo ivyacu twenyene, ariko ni iyo ivyo abari mw’isi bose (1Yohani 1: 9-2: 1-2)
Nyene inzu ni yaheza guhaguruka, akugara urugi, mugatangura gukomanga muhagaze hanze, muvuga muti Mupfasoni n’utwugururire. Ni ho azovuga ati Simbazi, sinzi n’iyo muvuye. Ni ho muzotangura kuvuga ko mwarira, mwanywera imbere yiwe kandi yigishiriza mu nzira z’i wanyu (Luka 13: 25-27). Iri jambo ngo Mupfasoni, ntaco ripfana na ca kirundi c’iki gihe kivuga ko umupfasoni ar’umukenyezi. Nta wuzi aho ico kirundi co mur’iyi misi cavuye, ariko kuva kera, umupfasoni yaba ar’umuntu yubashwe w’umunyacubahiro. Yesu rero yerekanye ko bazoha Imana icubahiro bitagishoboka kw’Imana ibemera. Nico umuhanuzi yavuze ngo “Bazojana ubusho intama n’inka zabo baja kurondera Uhoraho, ariko ntibazomubona! Azoba yitandukanije nabo (Hoseya 5: 6). Nico gituma dukwiye gushikama mu buntu bw’Imana, kugira ngo ntitumere “ nka Esawu, yagurishije ivyo kuba samuragwa kwiwe ingaburo imwe. 17Kuko muzi yuko hanyuma, hamwe yagomba kuragwa umugisha, atemerewe, kuko atabonye uburyo bwo kwihana, naho yawurondera cane arira” Abaheburayo 12: 16-17).
Hari benshi bitwaza ngo barabatijwe, ngo n’abana babo bose barabatijwe, bakavuga amasengero bubatse, amatafari yo kwubaka insengero n’amazu y’ishengero bubatse, abandi bakishimira ko bari muri Chorales, n’ibindi vyinshi, ariko bakanka kwumvira ubutumwa bwiza bwo mu Vyanditswe kubera umunyenga wo mw’ishengero wabaryoheye.”Ni ho muzotangura kuvuga ko mwarira, mwanywera imbere yiwe kandi yigishiriza mu nzira z’i wanyu” Luka 13: 26).
Kwigisha Ivyanditswe ntaco bipfana no kwigisha idini. Kandi kumenya ivy’idini, ntaco bipfana no kumenya Ivyanditswe Vyera, no kwandikwa mu gitabo c’idini, ntaco bipfana no kwandikwa mu gitabo co mw’ijuru. Iyo umuntu yamaze kuba ingaruzwamuheto y’idini, iyo umweretse Ivyanditswe Vyera aca atangura kuvuga ngo idini ntirizojana umuntu mw’ijuru. Ivyo kenshi barabivuga mu gihe ata n’idini umuvugabutumwa yigeze acisha mu kanwa. Ah’ubwo Satani akorera muri bo, aba yumvise ko inkingi z’urusengero rwiwe zitanguye kunyiganyiga. Niwe yivugira muribo ngo “ Idini ntirizojana umuntu mw’ijuru. Ariko aho naho nyene Satani azohatsindirwa. Kuko niba idini ndimwo canke iryo wewe urimwo ritazotujana mw’ijuru, none kuki turijamwo, tukariha amahera yacu, n’inguvu zacu, n’umwanya wacu? Nuko nk’uko mwakiriye Kristo Yesu Umwami wacu, mube ari ko mugendera muri we, mumushinzemwo imizi, mumwubakwamwo, mushikamishijwe n’ukwizera nk’uko mwigishijwe, murushiriza gushima. Mwirinde, ntihakagire uwubagira imbohe, abanyagishije ubwenge bw’abantu ari ibihendo vy’ubusa, bikurikira akaronda k’imigenzo y’abantu, bikurikira ivya mbere vyo mw’isi, bidakurikira Kristo (Abakolosayi 2: 6-8)
Iryo dini ritazojana abantu mw’ijuru, Yesu ntari muri ryo, n’ukurijamwo n’uguta umwanya. Abari mw’idini rya Yesu bose rizobana mw’ijuru kuko Yesu ari muri ryo, kandi “ Aho ni ho ukwihangana kw’abera guserukira, bitondera ivyagezwe n’Imana n’ukwizera Yesu (Ivyahishuwe 14: 12). Idini ry’Imana ryamyeho hagati y’amadini y’abahakanyi. Nico Ivyanditswe Vyera bivuga ngo “Maze abantu benshi bo mu mahanga yo mur’ico gihugu, batora idini y’Abayuda (Esiteri 8: 17). Muze natwe tuvuge ubutumwa, tubeho nk’abantu b’Imana, tureke Yesu atwigishe ukugira neza kwiwe, mu kwumviriza ingorane z’abo tubana, no kubafasha no kubihebera, nkuko Kristu yabigenza. “ Idini itunganye itagira agasembwa imbere y’Imana Data wa twese, ni ukuraba impfuvyi n’abapfakazi mu marushwa yabo, no kwirinda ngo ntiwanduzwe n’ivyo isi” (Yakobo 1: 27)
Azobabwira ati: « Ndababwire, sinzi iyo muvuye; mviraho, mwebwe mwese mwabakora ibizira mwe. » Aho ni ho hazoba amarira no kuryanya insya z’amenyo, aho muzobonera Aburahamu, Isaka, Yakobo n’abavugishwa n’Imana bose bari mu bwami bw’Imana, namwe muhindiwe hanze. Hazoza abava mu buseruko, mu burengero, mu buraruko no mu bumanuko, bazokwicara mu bwami bw’Imana.Kandi hari abo inyuma bazoba abo imbere, n’abo imbere bazoba abo inyuma (Luka 13: 22-30). Benshi bazotangazwa no kubona ko bari barabeshwe, aho kugwana intambara yo muri Mpwemu ngo bayoborwe n’Ijambo ry’Imana, bakayoborwa n’idini ry’ibinyoma gusa. Bakishimira ibitangaro no kuvugishwa, ntibumve ko na Satani ashoboye gukors ivyo bitangaza no kuvugisha abavugishwa biwe! “ Kuko izo ari impwemu z’abadayimoni, zikora ibimenyetso, zija ku bami bo mw’isi yose, ngo zibakoranirize ku ntambara yo ku musi uhambaye w’Imana Ishobora vyose (Ivyahishuwe 16: 14). Dusubire ku vyagezwe no kuri vya Bishingantahe! Ni batavuga ibihwanye navyo bazoba mu bgirantibuce (Yesaya 8: 20).
Igihe kirashitse, ubwami bw’Imana buri hafi, ni mwihane mwemere ubutumwa bwiza (Mariko 1: 15); mwizina ryera rya Yesu. Amen.
Publié dans:Non classé |on 28 mai, 2017 |Pas de commentaires »

MURIRINDA IMBWA…

MWIRINDE ZA MBWA…
Image result for dog eating meat
MWIRINDE ZA MBWA, MWIRINDE ZA NKOZI Z’IBIBI, MWIRINDE BAMWE BIKEBAGURA (Abafilipi 3: 2)

Hariho imirongo dusoma muri Bibliya, ukamenga ntiyahumetswe n’Imana, kuko imeze nk’ibitutsi, canke ukamenga Mpwemu Yera yari yashavuye igihe yavugisha abakozi biwe. Uwu murongo uravyerekana ngo “Mwirinde za mbwa”… Umuvugabutumwa yotinyuka akavuga uwu musi ngo abantu n’imbwa, naho boba ar’abasambanyi, canke abarozi n’abicanyi, uwo muvugabutumwa yogira ingorane mu b’iki gihe.

Ariko Mpwemu Yera, agize imisi atwereka ko hariho abapasitori bameze nk’imbwa zitazi gukuga. Twarize mu misi ishize ngo : “Abashibamyi biwe n’impumyi, ntaco bazi, bose ni nk’imbwa z’ibiyingiyingi, zitazi gukuga, bararavuta, bararyama, bakunda gusinzira. Mbere ni nk’imbwa z’ibigunya zitigera zihaga, kand’abameze bartyo n’abungere (Yesaya 56: 10-11)
Bibliya iravuga rwose ko icatumye abo bakozi babi Mpwemu Yera abita imbwa, kw’ar’ukubera ko yabahaye umuti wo kudahwa canke kuruka ishano bariye muri Babuloni y’ivyaha no mu gipagani kibakikije, ariko baranka basubira ku vyo bari badashwe. “Icobaye ciza kuri bo, iyaba batigeze kumenya inzira yo kugororoka, hako basubira inyuma, bamaze kuyimenya, bagata icagezwe cera bahawe. Ivyabashitseko ni ivyo uwu mugani w’ukuri ngo imbwa isubiye ku vyo idashwe; kandi, ngo ingurube yuhagiwe isubiye kwivurunga mu vyondo (2Petero 2: 21-22).
Niho rero Mpwemu abitegereje, abona ukuntu bakunda kurya ibitaribwa mu mazu yabo no ku misi mikuru bizaniye, ukuntu bamusezeraniye ko ata yindi mana bazomubangikanya, ariko ifaranga, icubahiro, ukugaragara neza imbere y’ab’isi, nivyo bisigaye bibaraza bataryamye, kuruta uko bitwararika intama z’Imana, noneho Mpwemu ati “ Nkukw’imbwa isubira kuvyo idashwe, nikw’igipfu gisubira ku bupfu bwaco (Imigani 26: 11).
Uhoraho yerekanye mur’iyi misi ya nyuma ko ibikoko bihumanye; hirya no hino kw’isi baravuga ingwara zifata ibitungwa n’ibiguruka, bigatuma abariye inyama zavyo bagwara ingwara mbi z’uburyo bwinshi, zishobora no ku bica. Ariko abungere ntibatinya kurya ivyo bintu, ntibashahaka no kuburira intama. Hariho umuvumo uri ku gihugu kubera abo bungere batinya kuvugisha ukuri kubera inda zabo. http://www.dailymotion.com/video/xm… (Fyonda urabe iyo video niba wumva igifransa iragusobanurira vyose)
Nkumbure wobona barya ivyo bintu, bakavyibuha, bagakomera ukibaza ngo n’amahoro. Oya, “Imana ntiyiciraho” (2Samweli 14: 14). Ubutumwa bwiza buravuga ngo “Ntubice, abantu banje boye kwibagira; ubasabagirishe ubushobozi bwawe ubacishe bugufi, Mwami nkizo idukingira. Amajambo yo mu minwa yabo, niyo gicumuro c’akanwa kabo. Ubwibone bwabo bubafate nk’umutego, bo n’imivumo n’ibinyoma bavuga. Babandi baze batahe ku mugoroba bagwangware nk’imbwa, bagendure igisagara. Bahunahuna hose barondera inyama, nibatahaga bakeshe ijoro. Ariko jeho nzoririmba inkomezi zawe, mbere mu gitondo nzoririmba imbabazi zawe n’ijwi rirenga (Zaburi 59: 11-12, 14-16)
Nagerageje gushigikiza ubu butumwa imirongo yo mu Vyanditswe Vyera kugira ngo wumve ko amajambo y’Imana acumita mu mutima nk’inkota, kandi akababaza nk’inkambi zikanda mugisebe. Kukw’ariyo ikomeretsa kandi ikaba ariyo isomora, irakubita, kand’amaboko yayo akaba ariyo akanda ahababaye. “ Kuko ijambo ry’Imana ari rizima, rifise ubushobozi, rifise ubugi buruta ubwo inkota zose, rikinjira n’aho ritanya ubugingo n’impwemu, rigatanya ingingo n’umusokoro, risuzuma ivyo umutima wiyumvira, ukagabira (Yobu 5: 18, Abaheburayo 4: 12).
S’umugambi w’Imana ko abamaze kumenya ukuri kw’iki gihe babandanya kwitereka inkono z’inyama nkuko vyari muri Egiputa. Abari baramogojwe n’inyama zo muri Egiputa, basavye ngo Uhoraho abahe inyama bageze mu bugaragwa “ibarekurira inyama zingana n’umukungugu… Nuko bararya barahimba, yabahaye ivyo bipfuje. Batari bwatandukane n’ukwipfuza kwabo, ivyokurya vyabo bikiri mu kanwa kabo, ishavu ry’Imana ribakurira hasi, ryica abagabo bakomeye bo muri bo, ritsinda hasi imikangara yo mu Bisirayeli. (Zaburi 78: 27, 29-31). Iyi zaburi yerekanye neza ko kurya inyama biva mu kwipfuza kw’abantu atari mu cipfuzo c’Imana. Nico iri jambo rivuga ngo “ yabahaye ivyo bipfuje. Batari bwatandukane n’ukwipfuza kwabo, ivyokurya vyabo bikiri mu kanwa kabo”…
Kurya inyama n’umuvumo ukomoka mu caha cakozwe na Adamu na Heva muri Edeni, nico gituma inyama zatanguye kuribwa inyuma y’umwuzure, kugira ngo zigabanye imyaka yo kuramba kw’abantu. Gereranya imyaka y’umukurambere wacu mu kwizera yitwa Mutushela, n’imyaka yacu mur’iki gihe uca wumva akaga turimwo. “ Imisi yose Metushela yamaze, yabaye imyaka 969; araheza arapfa (Itanguriro 5: 31). Uwu mugabo nta nyama yariye, ndetse na se wiwe ntazo yariye. Se wa Metusela, yar’afise ukwizera gukomeye mu Mana. Bibliya imushingira intahe ngo ” Ukwizera ni kwo kwatumye Henoki ajanwa mw’ijuru, ngo ntabone urupfu, kandi ntiyaboneka, kuko Imana yamujanye. Kuko yashingiwe intahe atarajanwa yuko yahimbaye Imana” (Abaheburayo 11: 5).
Kuko imbere y’umwuzure, naho habaye abanyavyaha, hariho ubwoko bw’Imana bwitoranirijwe kubw’ubuntu. Ubwo bwoko nibwo Uhoraho ashaka gutandukanya n’imbwa, mur’ibi bihe vy’iherezo. “ Inyuma hazoba imbwa, abarozi, abashurashuzi, abicanyi, abasenga ibigirwamana n’umuntu wese akunda kubesha akabikora” (Ivyahishuwe 22: 15). Abica abantu sibo bicanyi gusa, n’abica ibikoko, n’abicanyi, kuko navyo bikwiye gukingirwa, kuko navyo vyaracunguwe nka twebwe. “ Kuko ivyaremwe vyiteze uguhishurwa kw’abana b’Imana biguhahamiye cane. Kuko ivyaremwe vyagezwe kuganzwa n’ibitagira ikimazi, kandi si vyo vyavyigombeye, ariko vyagizwe n’Iyageze ko biganzwa bityo, kugira ngo vyizigire yuko na vyo bizocungurwa ngo ntibibe ibihumbwa vyo kubora, bizohabwa ukwidegemvya, gufatana n’ubwiza bw’abana b’ Imana. Kuko tuzi yuko ivyaremwe vyose binihira hamwe bikaramukirwa hamwe kugeza n’ubu. Kandi si co gusa, ariko natwe abafise ku vyeze ubwa mbere vya Mpwemu, natwe nyene tunihira mu mitima yacu, twiteze gucika abana b’Imana, ni kwo gucungurwa kw’imibiri yacu (Abaroma 8: 19-23).
Imana ikirema umuntu yamuzimanye ivyokurya vyiza bitagira inyama, kuko nta rupfu rwari bwaseruke kw’isi. Ariko uwu musi, inyama ziboneka kuko hariho urupfu rw’ikiremwa rwabaye. Itegeko ryo ntirihinduka rivuga ngo “ Ntukice” (Kuvayo 20: 13). Iri tegeko ntirivuga ubwoko bw’ivyo tutemerewe kwica, ar’abantu canke ibikoko, rivuga gusa ngo ntiwice. Ukwica ukw’arikwo kwose n’icaha. Niba vyarabaye imbere y’urupfu rwa Kristu, intambara zikaba, abantu bakicana, ibikoko bikicwa, n’ukuri, ababandanya iyo ngendo nyuma y’urupfu rwa Kristu, bose bazobona ibara. Twebwe twahawe umuco uruta uwo basogokuru bari bafise. “ Uwahawe vyinshi wese azobazwa vyinshi; uwabikijwe vyinshi ni we bazorushiriza kwaka vyinshi (Luka 12: 47).
Ubutumwa twikoreye ku bitugu, butangura buvuga ngo “Ehe ndabahaye ivyatsi vyose vyama utubuto biri kw’isi yose, n’igiti cose cama ivyamwa birimwo imbuto zavyo: bibabere ivyokurya vyanyu. Kandi n’ibikoko vyose vyo kw’isi, n’ibiguruka mu kirere vyose, n’ivyikwega hasi vyose birimwo ubugingo, mbihaye ivyatsi bitotahaye ngo bibibere ivyokurya vyavyo (Itanguriro 1: 29-30). Ibi vyokurya nivyo Adamu na Heva barariye ku mugoroba mu gutangura isabato, kuko yaciye itangura. “ Ku musi ugira indwi Imana inonosora ibikorwa vyayo vyose yakoze, iruhuka ku musi ugira indwi, ibikorwa vyayo vyose yakoze. Nukw’Imana ihezagira uwo musi w’indwi iraweza: kukw’ariwo yaruhukiyekw’ibikorwa vyayo vyose, ivyo yaremye kandi yakoze (Itanguriro : 2: 2-3). None uwu musi mu gutangura isabato, uza kurarira ivyokurya bimeze bite? Ni waba ubonye iki cigisho hagati mu ndwi, wumva isabato igiye kuza uzoyitangura wariye ibimeze gute?
Ubutumwa rero busozera buvuga kandi ngo “ Harahiriwe abamesura imvune zabo, kugira ngo babone kwegera ca giti c’ubugingo, kandi bace mu birimba bashike kuri wa murwa (Ivyahishuwe 22: 14). Iri jambo ngo “ imvune” n’ikirundi ca kera, gisobanura “ amakanzo”. Ikindi, mu ndimi nyinshi, uwu murongo uvuga ngo “ Harahiriwe abakomeza amatego y’Imana, kugira ngo babone kwegera ca giti c’ubugingo, kandi bace mu birimba bashike kuri wa murwa”. Iki giti c’ubugingo nta muntu ary’inyama yokiryako, kuko na Adamu amaze gucumura ntiyasubiriye kukiryako. Nivyo ubutumwa buvuga ngo “ Uhoraho Imana aravuga ngo “Eh’ uyu muntu ahindutse nk’imwe yo muri twebwe ku vyo kumenya iciza n’ikibi, none rero yohava atuma ukuboko akamura no no ku giti c’ubugingo, akarya, akazokwamaho ibihe bidashira. ”Nico catumye Uhoraho Imana amukura muri iryo tongo ryo muri Edeni, ngw’aje kurima ivu yakuwemwo. Nuko yirukana uwo muntu… (Itanguriro 3: 22-24)
Mwirinde rero ubutumwa bubemerera kurya no kunywa vyose, kuko “ Vyose ndavyemererwa, ariko si vyose bingirira ikimazi. Vyose ndavyemererwa, ariko sinzoganzwa n’ikintu na kimwe. (1Abakorinto 6: 12). Vyose ntibihumanya koko, ariko, uwo muntu arya ibimutsitaza, azobona ibara. Ni ciza kutarya inyama, canke kutanywa umuvinyu … (Abaroma 14: 20-21). Twavuze ko hariho ingwara ziterwa no kurya inyama, nico gituma mukwiye kwibuka ibi: “ Mbega ntimuzi yuko muri urusengero rw’Imana, kandi ko Mpwemu w’Imana mubana? Umuntu ni yonona urusengero rw’Imana, Imana izomurandura; kuko urusengero rw’Imana ari urwera, kandi urwo rusengero ni mwebwe” (1Abakorinto 3: 16-17)
War’uzi ko gukunda inyama bihindura umutima w’umuntu agacika nk’ingwe mu gihe abonye ibimushavuza canke mu gihe ubugizi bwa nabi bwiyongereye mu gihugu? Hariho n’ubudasa hagati y’ibikoko birya inyama n’ibitazirya. Hariho inyungu nyinshi ku bihana inyama, kuko naho bigora, iyo twihanye birashoboka “ Mukundwa, ndagusengera ngo umererwe neza muri vyose, uhore uhangamye, nk’uko ubugingo bwawe bumerewe neza ” Ingaburo y’imboga irimwo urukundo, iruta inyama y’inka inuze zirimwo urwanko (3Yohani : 2, Imigani 15: 17). Ibi nivyo Daniyeli yabwiwe na Mpwemu Yera, yirinda kurya inyama zari kuzana urwanko hagati yiwe n’Imana, avuga ati “ Ndakwinginze twebwe abasavyi bawe imisi cumi baduhe indya z’insoromano, abe arizo turya, n’amazi yo kunywa, uheze witegereze mu maso hacu no mu maso h’abasore barya ku vyokurya vy’umwami…”(Daniyeli 1: 12-13)
MWIRINDE ZA MBWA, MWIRINDE ZA NKOZI Z’IBIBI, MWIRINDE BAMWE BIKEBAGURA (Abafilipi 3: 2). Ntibivuze ko abarya inyama ar’imbwa, ariko Bibliya yerekana ko kurya inyama bigabanura umwete mu vyo gushaka ukuri kw’Imana, gushika naho umuntu asubira mu vyo yahevye. Kurya inyama bizoteba biboneke rwose nk’umuvumo, nivyo ubutumwa bwasemereye ngo “ Babandi baze batahe ku mugoroba bagwangware nk’imbwa, bagendure igisagara. Bahunahuna hose barondera inyama, nibatahaga bakeshe ijoro. Ariko jeho nzoririmba inkomezi zawe, mbere mu gitondo nzoririmba imbabazi zawe n’ijwi rirenga (Zaburi 59: 11-12, 14-16) Mbe war’uzi ko gukunda inyama bitera kugira ubwoba imbere y’ibigeragezo? “ Kandi kubwo kwugarizwa no gusugerezwa, abansi banyu bazoba babasugereje, muzoruhira kurya uruvyaro mwivyariye, murya abana banyu b’abahungu n’abakobwa, abo Uhoraho Imana yanyu azoba yarabahaye (Gusubira mu Vyagezwe 28: 53). Mbega ushaka kuba ku ruhande rw’abazeye ubukomezi bwabo kw’Uhoraho, bakazinduka baririmba imbabazi ziwe n’ijwi rirenga? Canke ushaka kuba mu ruhande rwa ba bandi bazera inkomezi mu nyama, bakariririmbira Imana ar’uko bahaze?
Ubutumwa bwiza nkubu ntibutahurwa na bose, ariko Uhoraho azobibatahuza, kuko “, mur’ubwoko bwera bwarobanuriwe Uhoraho Imana yanyu, yabatoranije mu mahanga yose yo mw’isi ngo mube ubwoko yiharije. Icatumye Uhoraho abakunda, akabatoranya, s’uko mwarusha ayandi mahanga yose ubwinshi, mbere mwar’ubusa hanyuma y’ayandi yose. Ariko n’uko Uhoraho abakunda… (Gusubira mu Vyagezwe 7: 6-7), mw’izina ryera rya Yesu. Amen.
Publié dans:Non classé |on 27 mai, 2017 |Pas de commentaires »

IVYOKURYA VYO MU GITONDO (59)

IVYORYA VYO MU GITONDO (59)
NI WABA UR’UMWANA W’IMANA (5)
Umuco w’ukuri wakira umuntu wese wariko uraza mur’iyi si. Yari mw’isi kandi isi yaremwe nawe, arikw’isi ntiyamumenya; yaje mu vyiwe ariko abiwe ntibamwakiriye. Ariko abamwakiriye bose yabahaye ububasha bwo gucika abana b’Imana, nibo bizeye izina ryiwe, nibo batavyawe n’amaraso, canke n’ukwipfuza kw’umubiri, canke n’ukwipfuza kw’umugabo, ariko bavyawe n’Imana (Yohani 1: 9-13).Image result for private prayer
Iki nico cigisho kirangije ivyigisho vyose twabonye bivuga ibigeragezo vya Yesu mu bugaragwa. Satani yabwiye Yesu ngo : “ Ni waba ur’Umwana w’Imana…” Imutegera ku nda kuko yabona ashonje, Yesu ayitsindsha Ijambo ry’Imana. Imugerageresha poritike n’ubutunzi, Yesu naho nyene ayitsindisha ijambo ry’Imana. Imugerageresha amanyama y’ubusore ngo yiterere hasi, Yesu arayirukana. Iramucunga, imutegera mu rupfu rwo ku musaraba, Yesu arayinesha. Uwo Yesu tuvuga yatsinze Satani, “abamwakiriye bose yabahaye ububasha bwo gucika abana b’Imana, nibo bizeye izina ryiwe” (Yohani 1: 12).
Satani ntazogutinya ngo n’uko wahisemwo kwizera Yesu yatsinze. Na wewe azogushira imbere y’ivyokurya n’ibinyobwa bihumanye n’ibidahumanye, akubwire ngo “ Ni waba ur’umwana w’Imana fata kur’ibi bintu urye, kuko handitswe ngo “ic’Imana yaremye cose ni ciza, ntiharimwo ico gutabwa iyo cakiriwe n’uwushima (1Timoteyo 4: 4). Uramubwira uti: “Vyose ndavyemererwa ariko vyose ntibingirira ikimazi. Vyose ndavyemererwa, ariko sinzoganzwa n’ikintu na kimwe (1Abakorinto 6: 12). Azogutega ushonje, akwereke ivyokurya n’inzoga, uramubwira uti: “abaganzwa na kameremere y’umubiri bitwararika ivy’umubiri, abaganzwa n’impwemu bitwararika ivy’impwemu. Kwitwararika ivy’umubiri kuzana urupfu, kwitwarararika ivy’impwemu bizana ubugingo n’amahoro (Abaroma 8: 5-6). Satani azogutuma ab’i wanyu canke incuti n’abagenzi, ngo bakujane mu bukwe bwabo canke mu misi mikuru, aho barya bakanywa bakimara ishavu. “Ntuze winjire mu nzu yabo y’amazimano ngo wicarane nabo, usangire nabo. Ntimushobora gusangira ivyo ku meza y’Umwami wacu n’ivyo ku meza y’abadayimoni, ntimushobora kunywera ku gikombe c’Umwami wacu no kunywera ku gikombe c’abadayimoni. Ntuze ubemerere naho bokubwira amajambo meza (Yeremiya 16: 8, 1Abakorinto 10: 21, Yeremiya 12: 6). Wewe uri mw’isi ariko ntur’uw’isi, kuko n’Umwami wawe atar’uw’isi (Yohani 17: 16)
Satani azokugerageresha poritike, n’ubutunzi bw’amahera, no kugaragara neza imbere y’abandi bahungu, canke imbere y’abandi bakobwa. Azokwereka umuntu canke uruhande utegerezwa kugwanira, bibaye ngombwa ugapfa. Ati: Handitswe ngo: “Ewe wa musore, nezererwa ubusore bwawe (Umusiguzi 12: 1), ati na Daniyeli yar’umunyaporitike, n’ibindi. Ubwire Satani uti: Ubwami bwanje s’ubwa hano. Ariko namba mufise ishari ry’inkazi mu mitima yanyu, mugakunda kwirema ibice, mwoye kwirata, mubesha, mucumura ku kuri. Ubwo bwenge sibwo bwururuka buvuye mw’ijuru, ariko n’ubw’isi, n’ubw’abantu, n’ubw’abadayimoni. Kukw’ah’ishari riri bo no kwirema ibice, ariho umuvurungano uri n’igikorwa kibi cose (Yohani 18: 36; Yakobo 3: 14-16). Daniyeli na Dawidi nibo Satani akunda kwitwaza. Abo bari babihawe n’Imana kubera umugambi w’agakiza kayo. Bitabaye uko Satani ashaka, azokwereka ko abahawe umuhamagaro wo kuganza ibihugu ko utagomba kububaha, yitwaje bimwe vyiwe vy’uburenganzira mur’ibi na biriya, umubwire uti : “Umuntu wese n’agamburukire abaganza kuko ata kuganza kutava ku Mana, ukuriho kwazanywe n’Imana (Abaroma 13: 1). Mu gihe umutegetsi atavuga ibiteye kubiri n’Imana, utegerezwa kumwubaha (Abaroma 13: 1-7, urahasoma).
Satani azokwereka amahera n’amazu meza, amamodoka n’amatongo, ngo ukunde uve mu kwizera Yesu wifadikanye n’abatagira agakiza mu bugingo bwabo, uramubwira uti : “Iyo dufise ivyo turya n’ivyo twambara ivyo biba bitubumvye. Ariko abagomba kuba abatunzi, bagwa mu nyosha no mu mutego no mu kwipfuza kw’ubupfu gusinzikaza, kudobeza abantu mu bibonona, bikabarandura. Kuko gukunda amahera ar’imizi y’ibibi vyose (1Timoteyo 6: 8-10).
Satani azokwereka inzira z’icaha zituma uronka igitenge ciza utiriwe uraruha. Akwereke uburyo uzogendera muri za Carina na za Nissan utiriwe uraruha, n’ibindi vyinshi. Uramubwira ko “iyi si iriko irashirana n’ivyipfuzo vyayo, ariko uwukora ivy’Iman’ishaka yamaho ibihe bidashira (1Yohani 2: 17)
Azokudugana ku gatwe ku rusengero nka Yesu, ati ni waba wahawe ubushobozi bwo gucika umwana w’Imana, genda ugire sports gurtya baguhe amashi menshi n’imidari y’ishimwe, nawe umenyekane, kuko handitswe ngo : muzokwama mur’abo hejuru ntimuzoba abo hasi (Gusubira mu Vyagezwe 28: 13), Uramubwira uti: “Umwagazi yishwe kubw’ibicumuro vyanje, niwe akwiriye guhabwa ububasha, n’ubutunzi n’ubwenge n’icubahiro no guhimbazwa n’umugisha. (Ivyahishuwe 5: 12). Ati ni wiyambure abantu babone ubwiza bwawe, utambe, usimbe ugire sports, baguhe amashi. Ntumwemerere: “Amaso yabo yuzuye ubusambanyi, ntahaga ivyaha, basukasuka imitima idashikamye, bafise imitima yamogoreye kwipfuza inyungu, nibo bana b’ibivume (2Petero 2: 14).
Abizera Imana vy’ukuri bagiye kumenyekana, Abazoba bananiye Satani ku buryo bwose no mu bigeragezo vyinshi tutiriwe twandika, Satani azobagerageresha ca kimenyetso ciwe c’igikoko/c’inyamaswa. Bazotegekwa gukoresha amaboko yabo kw’isabato. Ni bavyemera bazoba bacumuje amaboko yabo, babe baronse ikimenyetso c’igikoko ku kiganza c’i buryo. Bazoja mu ruhande rw’abafise ibitekerezo bivuga ko dimanche ariyo sabato y’abakrisitu n’abanyamahanga bose, aho abantu bategekwa kwumvira abantu nkabo gusumba Imana. Ukwo nikwo gufata ikimenyetso c’igikoko ku ruhanga rwawe. Menya neza ko amategeko y’Imana nkubwira s’ayo kwanjwanjwako; “ Ivyo bize bibe nk’ikimenyetso gishizwe ku maboko yanyu, kandi nk’ibishizwe mu ruhanga, hagati y’amaso yanyu (Kuvayo 13: 16), kuko Uhoraho yadukuje muri Egiputa y’ivyaha amaraso y’igiciro y’Umwana wiwe, Yesu-Kristo.
Mu kurangiza iki cigisho, nagomba ndabamenyeshe ko hariho ibintu bine Satani akoresha mur’iyi misi ya nyuma kugira ngo aduce intege, Ni 1/ Amahera, 2/Abagabo n’abasore abahendesha abagore beza n’inkumi nziza, abakobwa nabo abereka imisore idasanzwe ifise inkanya z’amahera, 3/ Amatongo nayo n’ikigeragezo ku buryo Satani atwibagiza vyose abantu bakicana bakankana kubera amatongo. 4/ Inzoga n’ibiyovyabwenge vy’uburyo bwose, Satani arabikoresha kugirango yifatire mu ntoke imibiri n’imitima y’abahungu n’abakobwa b’Imana. N’uko rero “Imana Nyen’amahoro ibe ariyo ibeza rwose, kandi impwemu zanyu, n’ubugingo n’umubiri vyose hamwe bizigamwe, ngo bize bisangwe bitagira umugayo, aho Umwami wacu Yesu-Kristu azozira. Mukurikirane kugiriranira amahoro n’abantu bose, n’ukwezwa, kuko uwutejejwe atazoraba Umwami ( 1Abatesalonika 5: 23, Abaheburayo 12: 14).
Nuko, “igihe kirashitse, ubwami bw’Imana buri hafi, ni mwihane mwemere ubutumwa bwiza (Mariko 1: 15), mw’izina ryera rya Yesu. Amen.
Publié dans:Non classé |on 4 mai, 2017 |Pas de commentaires »

IVYOKURYA VYO MU GITONDO (57)

IVYOKURYA VYO MU GITONDO (57)

NIWAB’UR’UMWANA W’IMANA…(4)

ICIGISHO CA KANE DUKURA MU BIGERAGEZO SATANI YAGERAGERESHEJE YESU MU BUGARAGWA: Niwaba ur’Umwana w’Imana…
Image result for Bibiliya yERA
Mu kugerageza Yesu, mu bigeragezo bibiri: ica mbere n’icanyuma, Satani yatanguje aya majambo ngo: » Ni waba ur’umwana w’Imana… ». Miri iki cigisho,tugiye kuraba icabimuteye. Muri kumwe n’umunyavyaha yagiriwe ubuntu akaba na mwene So musangiye intambara y’umusaraba, Balthasar Miburo
Yesu yar’azi neza ko ar’umwana w’Imana. Ariko niba warasomye ibisubizo vyose yahaye Satani, yamweretse Ivyanditswe Vyera gusa, kandi vyo mw’Isezerano rya kera ngo: « Umuntu ntatungwa n’umutsima gusa (Gusubira mu Vyagezwe 8: 3). « Usenge Uhoraho Imana yawe, ube ariyo usaba yonyene « Gusubira mu Vyagezwe 6: 3) Ntukagerageze Uhoraho Imana yawe » Gusubira mu Vyagezwe 6: 16).
Har’abantu bihaye kutesha ubushobozi Ivyanditswe Vyera vyo mw’Isezerano rya kera, cane cane iyo babonye ko bitajanye n’ivyo idini ryabo ryabigishije. Yesu n’Intumwa ziwe ntibigeze bakoresha Igitabo c’Isezerano rishasha. Bakoresheje ivyo abahanuzi bavuze gusa, mu kwerekana ko Yesu ari we Kristu. Umusi Yesu yazuka, yahuye n’abigishwa babiri b’i Emausi, bariko baravugana ukuntu Yesu yapfuye. Bari bihevye, ariko » Atangurira kuri Mose no ku bavugishwa n’Imana bose, abasobanurira mu vyanditswe vyose ivyanditswe kuri we (Luka 24: 27). Asezera abigishwa biwe, imbere yo kuduga mw’ijuru, « Maze arababwira ati “Aya ni yo majambo nababwira nkiri kumwe namwe, yuko ibyanditswe kuri jewe vyose mu mategeko ya Mose, no mu byahanuwe no muri Zaburi bikwiriye gushika.”Maze abungura ubwenge ngo basobanukirwe n’ibyanditswe, ati “Ni ko byanditswe ko Kristo akwiriye kubabazwa no kuzuka ku munsi wa gatatu, kandi ko kwihana no kubabarirwa ibyaha bikwiriye kubwirwa amahanga yose mu izina ryiwe, bahereye kuri Yerusalemu (Luka 24: 44-47).
Kuvuga ko tudashobora kwemera ukuri tubitewe n’uko kuri mw’isezerano rya kera, n’ukuzimira rwose. Paulo igihe yigisha Abayuda b’i Roma bamugisha bamuhaririza, « arabasobanurira, ashingira intahe ivy’ubwami bw’Imana, abemeza ivya Yesu, abikuye mu vyagezwe/mu mategeko ya Mose no mu vy’abavugishwa n’Imana, ahera mu gitondo ashitsa ku mugoroba. Maze bamwe bemera ivy’avuze, abandi ntibavyemera (Ivyakozwe n’Intumwa 28: 23-24). N’ubu niko biri, ubutumwa bwo mw’Isezerano rya kera burerekana neza ko Kristu ar’urya yabambwe, ariko bwemera bamwe abandi ntibabwemera. Mur’iyi misi y’imperuka, har’abahisemwo kwemera uwundi Yesu bahawe n’amashengero yabo, Yesu ngo azirana n’amategeko. Isezerano rya kera na rishasha aruzuzanya.
Ni waba ur’umwana w’Imana rero… Ibuka Ivyanditswe vyera. Ntukunde ko umwansi aguter’ubwoba, umwereke neza, ko » Handitswe ngo ». Erega, Umwansi nawe arazi Ivyanditswe, n’abakozi biwe barazi Ivyanditswe, ariko bavuga ibibashigikira gusa ngo ibinyoma vyabo bishinge imizi. Kubw’ubushobozi bw’Imana, uzobona amajambo yose yo guhindura ubusa ivyo binyoma vyabo. « Ndakwihanikiriza mu nyonga z’Imana no mu za Kristo Yesu azocira urubanza abazoba bariho n’abazoba bapfuye, kandi no kubwo kuboneka kwiwe n’ubwami bwiwe, uvuge Ijambo ry’Imana, uhore ugavye mu gihe gikwiye no mu kidakwiye, Ukore igikorwa c’umuvugabutumwa, ushitse igikorwa c’ibanga cawe » (2Timoteyo 4: 1, 2, 5).
Yesu, ntabesha, yarabisezeranye. Mugihe uzoba uhanganye n’abafudika Ivyanditswe Vyera kubera inyungu zabo, yagize ati:, « Mpwemu Yera uwo Data azorungika mw’izina ryanje, azobigisha vyose, kand’azobibutsa ivyo nababwiye vyose. » Kandi ururimi ruzohagurukira kukuburanya, uzorutsinda (Yohani 14: 26 na Yesaya 54: 17)
Urugamba ntirugwanwa n’abiyemera berekana ko ar’abakristu kandi badafise ivyemezo vy’ubukristu bwabo. Ariko mwubahe Kristu mu mitima yanyu, muhore mwiteguye kwishura umuntu wese ababajije inyanduruko y’ivyizigiro biri muri mwebwe, ariko muri n’ubugwaneza mutinya, mufise imitima itarimw’ijwi ribagiriza ikibi, kugirango kuvyo muvugwa nabi, abatuka ingeso zanyu nziza zo muri Kristu bamaramare (1Petero 3: 15-16).
Nuko rero “ igihe kirashitse, ubwami bw’Imana buri hafi, ni mwihane, mwemere ubutumwa bwiza (Mariko 1: 15). Uhoraho akugirire neza, nk’umwana wiwe vy’ukuri. Mw’izina ryera rya Yesu. Amen.
Publié dans:Non classé |on 3 mai, 2017 |Pas de commentaires »

IVYOKURYA VYO MU GITONDO (56)

IVYOKURYA VYO MU GITONDO (56)

NIWABA UR’UMWANA W’IMANA…(3)

ICIGISHO CA GATATU DUKURA MU BIGERAGEZO SATANI YAGERAGERESHEJE YESU MU BUGARAGWA/MU BUTAYU(Luka 4: 9-12)
Image result for praising time pentecostal church
Amujana i Yerusalemu, amuhagarika ku gatwe k’urusengero aramubwira ati “Ni waba uri Umwana w’Imana, ikororere hasi kuko handitswe ngo ‘Azokuragiza abamarayika biwe ngo bakuzigame, kandi ngo ‘Bazakuramira mu maboko yabo ngo kumbure ntutsitare kw’ibuye ’ ” Yesu aramwishura ati “Vyaravuzwe ngo ‘Ntukagerageze Uhoraho Imana yawe.” (Luka 4: 9-12)
Iki kigeragezo gikunze guhitana abantu biyemera ngo bafise ukwizera kutajegajega. Ni musome neza: Satani ntiyinjije Yesu mu rusengero ariko yamunyujije inyuma yarwo, imuhagarika hejuru ku gatwe karwo, ku munara. Uko niko abantu bamwe, Satani ababuza kwinjira mu rusengero rwo mw’ijuru, ariho ahera cane ho mw’ijuru, ngo babone ubwiza bw’amategeko y’Imana, ngo bayihe icubahiro gikwiye. Uwagize amahirwe yo kubona ibiri muri urwo rusengero, yanditse ati: “Urusengero rwo mw’ijuru rurugururwa, mu rusengero rwayo habonekamwo isandugu ry’isezerano ryayo (Ivyahishuwe 11: 19). Iri sandugu ry’isezerano ni ryo ribitsemwo ya mategeko azokoreshwa mu rubanza. Ni yo ya mategeko, abigira abapasitori n’abavugabutumwa, bagenda babesha ngo yarabambwe ku musaraba. Ntirikabe!
Ariko uwo mwansi Satani atwara abantu gurtyo, akoresheje intumwa ziwe, akabacisha inyuma y’urusengero rufise amategeko y’Imana, akabereka ko barengeye vyose, ko amategeko atabaraba, ko bashobora gukora ibitangaro bashatse vyose, abantu bose babaraba, ku buryo ngo atacago co mur’iyi si cobahangara.Kuko baba bageze ku gatwe k’urusengero nyene. Burya ivyo ugira vyose, « ikigira ico kimaze, n’ukwitondera amategeko y’Imana » (1Abakorinto 7: 19). Mbega none amategeko tuyahinduze ubusa ukwizera? Eka namba, ahubwo ukwizera tugushigikize amategeko (Abaroma 3: 31).
Urugamba rwo kurwanya amategeko, ruhora rukomera iyo Satani yumvise ko har’uwuvuze ko isabato nayo iri mu mategeko y’Imana. VYOSE SATANI YOVYIHANGANIRA ARIKO ICO KIRAMUNANIRA. Nivyo kuko ikimenyetso c’uko tur’ubwoko bw’Imana koko, kibonekera mu kwitondera isabato yayo: « Ni jewe Uhoraho Imana yanyu, ni mugendere mu mategeko yanjye, mukomeze amateka yanjye kandi muyakurikize, kandi mujye mweza amasabato yanjye abe ikimenyetso hagati yanjye namwe, kugira ngo mumenye yuko ndi Uwiteka Imana yanyu (Ezekiyeli 20: 19-20) Ubwo abanka isabato y’Imana, mwese murazi isabato bakunda iyariyo: yo kumusi wa mbere w’indwi: Dimanche/icyumweru.
Abantu bageze kur’urwo rwego rwo ku gatwe k’urusengero, bashobora kwiyemeza ibintu birengeye ubushobozi bwabo bitwaje ngo Imana yabo iri kw’isonga. Bumva ivyiza vyose vyotaha i wabo, baririmba ngo bafise imana y’akatabonetse. Bashaka kugaragara neza hose no muri vyose ngo babe intashikirwa (Raba kw’ifoto hariya hejuru). Bahora baza kwemera ko bibeshe iyo bakorokeye hasi nyene, maze ukwizera kwabo kukagaragara ko kwari ukwa magendo. Iyo mana ikora ibitangaro hato nahato/vuba navuba, ititaye ku mategeko yo mu rusengero rwo mw’ijuru, s’Imana yo mu rusengero rw’i Yerusaremu, s’Imana yo mu rusengero rwo mw’ijuru. Iyo n’imana yo ku gatwe k’urusengero Dusubire ku Vyagezwe no kuri vya Bishingantahe! Ni batavuga ibihwanye na vyo bazoba mu bwirantibuce. Erega si jewe nabatumye abo bakamenyi, yamara barirukanze, jewe ntaco navuganye nabo yamara baravugishwa (Yesaya 8: 20 na Yeremiya 23: 21)
War’uzi ko gukora ibitangaza, gukiza ingwara, kwirukana abadayimoni, gufungura ijuru nka Eliya imvura ikagwa, kumanur’umuriro uvuye mw’ijuru, ko ivyo vyose bitererekana ko ur’umukozi w’Imana? Kuko, na Satani yobikora: »kandi ikora ibimenyetso bikomeye, imanura umuriro uva mu ijuru ugwa mu isi mu maso y’abantu. Iyobesha abari mu isi ibyo bimenyetso yahawe gukorera imbere ya ya nyamaswa (Ivyahishuwe 13: 13-14). Icerekana ko ur’umukozi w’Imana n’uko wubaha amategeko yayo gusa. » Uwuvuga ngo ndamuzi, ntiyitondere amategeko yiwe, n’umubeshi ntakuri kuri muri we(1Yohani 2: 4).
Erega, benshi bahendwa n’ivyo babona canke bumva, bakibagira ko » Gipfu ar’umugore w’indegeteranyi… Yicara ku muryango w’inzu yiwe, no ku ntebe ku gatwe hejuru… ngw’ahamagare abahahita. Ariko wa wundi ntaba azi ko ariho imizimu iri, kandi kw’abatumire biwe baba i bwina i kuzimu (Imigani 9: 13-15, 18). Uwu mugore avugwa hano, abiga ubuhanuzi mwese murazi ko ar’ishengero. Mu gihe abakobwa biwe bakoresha indirimbo nawe akavuza inkengeri/inzogera zivugira ku gatwe k’inzu yiwe, abahita barinjira iwe.
Hari vyinshi vyabaye mu bayoboke b’amashengero amw’amwe, abantu benshi bapfira mur’ico kinyoma, kandi bari bazi neza ko ata Mana yabibatumye. Ariko babonye ukuntu Satani abaha ivyo basavye, n’ukuntu ibitangaza bikorwa, bumva vyobagora kuvuga ko bakorera mu kinyoma. Aba, nibo Bibliya ivuga ngo: « Benshi bazombwira kuri wa musi ngo: Mwami Mwami, ntitwar’abantu bawe, ntitwavugishwa mw’izina ryawe, ntitwasenda abadayimoni mw’izina ryawe, ntitwakora ibitangaza vyinshi mw’izina ryawe? Niho nzobajinjiburira nti ntaho nigeze mbamenya, mviraho mwa bakor’ibizira mwe (Matayo 7: 22-23).
Yesu yari gushobora kwerekana neza ko ar’Umwana w’Imana kandi ko akir’umusore, agasimbira hasi kandi ntavunike. Ariko ntiyashatse kwumvira Satani. Kuko iyo wumviye Satani witwaje ngo ur’Umwana w’Imana, uba werekanye ko Satani iguhaye akazi, kandi ko ushoboye kugakora. N’uko rero nayo ihita itangura kugukoresha ivyo yishakiye. Wamaze kwemera ko witwa umukozi w’Imana, wishimikije gusa ko ur’umuntu wemewe mu bo musengana, ariko utazi no gusenga iyo ugeze i wawe. Wiyemeza gukora ibitangaza, ariko udashobora kwikorera igitangaza na kimwe ngo uhindure kamere yawe. Wibajije ko ushoboye vyinshi kubera ko wize, canke kubera ko watoranijwe ngo uze gukora amahugurwa, ariko mu mibereho yawe tutazi, wishwe n’irari ryo kwipfuza, ishari, ibiterasoni n’ibindi. Reka kwemera gukora ibikurengeye, ahubwo « Wubahe Imana, witondere amategeko yayo, kuko ari vyo bibereye rwose umuntu wese, Kukw’Imana izoshira igikorwa cose mu rubanza, bo n’ikintu cose gihishijwe, ar’ikibi ar’iciza » (Umusiguzi 12: 13-14)
Niba war’ugifise umugambi wo gukorera mur’iyo nzira, ukaba ar’umuhungu canke umukobwa, ukaba ur’umugabo canke umugore, bireke, uce bugufi imbere y’Imana. Satani azoguter’ingorane ndabizi, azokugwanya, ariko umubwire uti: « Ntukagerageze Uhoraho Imana yawe » (Luka 4:12). Manuka, uve ku gatwe k’urusengero. Warageragejwe, uremera, kandi waratsinzwe. Tukubona mw’ipantalo ugenda ariko ur’umupfu. Tukubona mu bitenge ugenda ariko ur’umupfu. Yesu ati : »Uvugwa kw’uri muzima ariko ur’uwapfuye (Ivyahishuwe 3: 1). Kandi ko dukorana n’Imana, turabinginga, ntimuhabwe ubuntu bw’Imana ngo mubupfushe ubusa (2Abakorinto 6: 1).
Uhoraho aguhe kugarukira hagufi,kuko : Igihe kirashitse, ubwami bw’Imana buri hafi, ni mwihane mwemere ubutumwa bwiza (Mariko 1: 15), mw’izina ryera rya Yesu. Amen
Publié dans:Non classé |on 3 mai, 2017 |Pas de commentaires »

IVYOKURYA VYO MU GITONDO (55)

 

IVYOKURYA VYO MU GITONDO (55)

NI WABA UR’UMWANA W’IMANA (2)

ICIGISHO CA KABIRI DUKURA MU BIGERAGEZO SATANI YAGERAGERESHEJE YESU MU BUGARAGWA (Luka 4: 5)
(Umurwanizi) aramudugana amwereka ubwami bwose bwo mw’ isi mu kanya gato, aramubwira ati “Ndaguha ubu bubasha bwose n’ubwiza bwabwo, kuko jewe nabuhawe kandi mbuhaa uwo nshaka wese. Yesu aramwishura ati “Vyanditswe ngo “Usenge Uhoraho Imana yawe, abe ari yo usaba yonyene.’ ” (Luka 4: 5-8)Image result for Jesus praying
Uwo mwansi yaduganye Yesu umusozi, ntiwibaze ngo wewe azokubabarira. Afise ukuntu yereka abahungu n’abakobwa ibibera mw’isi vyose uko ashatse mur’iki gihe, kandi benshi akababesha ko nabo bashobora kuvyitirirwa ni bamupfukamira bakamusenga. Hari benshi basigaye birirwa imbere ya za televiziyo zabo, barara baraba za videos, baraba amasanamu y’ibibera mu bihugu vyo hanze, ibibi n’ivyiza. Ubwo buryo bwo kwereka umuntu ubwami bw’isi yose mu kanya gato, Satani arabufise. Ariko nawe afise uwumurusha ubushobozi, nico gituma atashoboye kubukoresha mu myaka yose yamaze agwanya ingoma y’Imana. Iyi misi turimwo ni mibi cane kuko ubu Satani yararekuriwe kubukoresha. No mur’urwo rugamba rwo kugusha abantu mu kaga akoresheje ubwo buhinga, aribwo benshi bita ITANGAZAMAKURU, Imana irabandanya kurwanya Satani, igatuma abantu bayo, gukoresha ubwo buhinga mu kuvuga ubutumwa ngo bagarure abahungu n’abakobwa b’Imana « kuko Umwansi yabamanukiye afise inzigo nyinshi, aziko afise igihe gito » (Ivyahishuwe 12: 12).
Mu mateleviziyo no kuri za internet, niho benshi bumvira amakuru yo mpande zine z’isi, bagashobora kubona, ukuntu abahinga mu vyo kwica bakora, ukuntu abagumutsi bagumukana abategetsi, ukuntu abasambana basambana ku buryo butigeze bubaho, ibinyoma vyose vy’abategetsi b’ibihugu canke b’amadini bakabibona bakavyumviriza, abantu bigira ibigirwamana bahabwa impundu nk’Imana yo mw’ijuru bakababona, abatamba bambay’ubusa n’ibindi vyinshi… Ibi bituma imitima ya benshi ihungabana, bakumva nabo bashaka kumera nkabo babona mu mashusho, cane cane iyo ivyaha bikorwa babona ko bizana amafaranga menshi. Kuko gukunda amahera ar’imizi y’ibibi vyose; ayo bamwe bipfuje bakazimira, bagata ukwizera, bitobekeranisha imibabaro myinshi (1Tomoteyo 6: 10)
Abakinyi b’umupira n’izindi nkino ba rurangiranwa barasengwa nk’Imana, amazina yabo niyo avugwa gusa, izina rya Yesu ntirivugwa. Abakobwa bazi kwambara ubusa bariko barakora ibirori, amasports, intambo, nibo bahabwa amashi menshi, nibo batahukana imiliyoni z’amadolari, noneho umwana wese akavuka ashaka kumera nka bakuru biwe abona ku mboneshakure no ku ngurukanabumenyi, ariyo internet. Satani rero iyo yereka abahungu n’abakobwa bacu ivyo bintu, ababwira ngo: « Nuko numpfukamira ukansenga, buriya bwami bwose buraba ubwawe.” (Luka 4: 7). Weho rero muntu w’Imana, ivyo bintu, ntibikakuraze ishinga. Kuko ubutumwa bwiza buvuga ngo: « Nuko ntimugafatanye na bo, kuko kera mwari umwijima none mukaba muri umucyo mu Mwami wacu. Nuko mugende nk’abana b’umucyo (Abefeso 5: 7-8).
Umwanya wataye uja gusenga abantu nkawe, ukiyita « umufana wabo », ndakwinginze ngo wumve ko urya mwanya uzowubazwa ni wakomeza mur’iyo nzira mbi. « Ivyo ni vyo mwagenderamwo kera, nkukw’ivy’iyi si bigenda, mwumvira umwami w’abaganza ikirere, niwe mpwemu ikorera mu bantu b’intabarirwa. Kandi natwe twese twahora muri bo kera mu kwifuza kw’imibiri yacu, tugakora ivyo imibiri n’imitima yacu bigomba, kandi mu kameremere kacu twar’abo kurakirwa nk’abandi bose (Abayefeso 5: 2-3). Sinkubujije kumviriza amakuru canke gusoma, ariko hariho itandukaniro ryo kwumviriza canke gusoma amakuru bisanzwe, no kwigira umugaragu canke « umufana » w’ivy’isi.
Abahungu bacu n’abakobwa bacu bakwiye kwirinda ico cose gituma bacika ibigirwamana mu bandi. Nico gituma na Yesu ca gihe yagaburira abantu ibihumbi bitanu, atashaka na gato ko abantu bamwamamaza. We yar’aziko ar’Imana, ariko kubera wewe na jewe, yashaka kuduha iki cigisho, « Yesu amenye ko bagira bamufate ngo bamugire umwami, asubira ku musozi ari wenyene gusa. Ahejeje gusezera ishengero, aduga umusozi gusenga yiherereye. Bwagorovye ariyo wenyene gusa (Yohani 6: 15; Matayo 14: 23). Ndakwinginze ngo mu gihe uzobona ko abantu bagukunze, baguha icubahiro, ntuze wiyumve ko ur’agakomeye, ariko bigufashe kwiherera usenge ubwire Imana ko ariyo ikwiye ishimwe n’icubahiro cose. Amen.
Abantu barava muhira bakaza no mu nzu y’Imana bambaye nk’abagiye mu kabare, ngo n’abo mu bihugu vyateye imbere niko bambara. Kuko abo bantu baba baragiriraniye amasezerano na Satani yo kumusenga, kugirango bibonere amashi menshi n’icubahiro vyo mur’iyi si, ivyo guhesh’Iman’icubahiro ntaco biba bikibabwira. No mu rusengero, usanga umugabo canke umusore, umugore canke umukobwa bambaye uko bishakiye kugirango babone ababakubitiza ko akajisho. Abo bantu bakaba igitsitaza mu materaniro, ahovuye umugisha hakava umuvumo. Bariya bantu wita abo mu bihugu vyateye imbere, Bibliya ibita abo mu bihugu vyasubiy’inyuma, mur’aya majambo ngo: » Ubwiza bwawe ni bwo bwateye umutima wawe kwishira hejuru, kubengerana kwawe ni ko kononye ubwenge bwawe, nakujugunye hasi ngutangariza imbere y’abami kugira ngo bakwitegereze (Ezekiyeli 28: 17). Ubwo bwiza werekana ngo tubone ko ubengerana, ntibuzoshika mu gihugu c’ubwiza kireka wisubiyeko, ugaca bugufi. « Maze mu gishingo cy’ibihumura neza hazoba umunuko, mu gishingo cy’umweko hazaba umugozi, ahabaga umushatsi utsibye hazoba uruhara. Mu gishingo cyo kwambara ikoti ryiza bazokenyera ibigunira, ahari ubwiza hazoba inkovu » (Yesaya 3: 24).
Abandi bigira abaririmvyi bakabuhariwe, kugirango baronke amashi menshi, za amen na za Halleluya zohawe Imana bakumva ko aribo bakwiye kuzihabwa. Abandi bigira abapasitori n’abavugabutumwa b’akatabonetse: Bakavuga amajambo asosa, atwenza/ asetsa, bakavuga imigani n’ibitekerezo biteye ukubiri n’ivyo tusoma mu Vyanditswe Vyera, bakazana inkuru z’akataraboneka, kugirango abantu baze bavaravuga ngo Amem amen. Intumbero ya vyose kukaba ar’ukubona abantu babatangarira, bakwiza hose ishimwe ryabo. Ivyo bintu nivyo Satani akunze gukoresha mur’ibi bihe, kugirango bizanire icubahiro n’amahera menshi uwo bita umukozi w’Imana naho muvy’ukuri aba ar’umukozi wa Satani. »Kandi no muri mwebwe ubwanyu hazokwadukamwo abantu bavuga ibigoramye kugira ngo bakwegere abigishwa inyuma zabo » (Ivyakozwe n’Intumwa 20: 30)
Abakozi b’Imana b’ukuri bakwiye kurangwa no guca bugufi, badashaka kwigira ivyamamare, badashaka gutungishwa n’uko intama zabo ari nyinshi kandi zikamwa menshi, ariko bakishira musi y’ukuboko kw’Imana “y’Inyabushobozi yonyene, ishemagizwa,niyo Mwami w’Abami,uganza abaganza, niyo yonyene ifise ukudapfa, iba mu muco utegerwa, ata muntu yigeze kuyibona, atawushobora kuyibona. Icubahiro n’ubushobozi budashira, bibe ivyayo”. (1Timoteyo 6: 15-16)
Bene Data bakundwa, bashiki bacu namwe mwese musoma iki cigisho, “igihe kirashitse, ubwami bw’Imana buri hafi, ni mwihane mwemere ubutumwa bwiza” (Mariko 1: 15). Mw’izina ryera rya Yesu. Amen
Publié dans:Non classé |on 3 mai, 2017 |Pas de commentaires »

IVYOKURYA VYO MU GITONDO (53)

IVYOKURYA VYO MU GITONDO (53)
NI BANDE BAFISE UBUBASHA BWO KUBATIZA?
Ariko bizeye ubutumwa bwiza Filipo ababwiye bw’ubwami bw’Imana, n’ubw’izina rya Yesu-Kristu barabatizwa abagabo n’abagore. Maze intumwa ziri i Yerusaremu zumvise yukw’Abasamariya bemeye ijambo ry’Imana, zirungikayo Petero na Yohani, nabo bamanutseyo barabasengera ngo bahabwe Mpwemu Yera; kuko Mpwemu Yera ataribwamanuke ngw’aje no kur’umwe muri bo, bari babatijwe gusa mw’izina rya Yesu. Maze babarambikakw’ibiganza, bahabwa Mpwemu Yera (Ivyakozwe n’Intumwa 8:12, 14-17)Image result for bapteme d'immersion
Iki kibazo abenshi barakunda kukivuga cane ngo, none abapasitori nibo gusa bakwiye kubatiza? Kuki abadiyakoni bo batabatiza kandi Filipo yar’umudiyakoni gusa(Ivyakozwe n’Intumwa 6: 5) akaba yarabatije abantu? Nivyo tugiye kwigira hamwe mur’iki cigisho. Muri kumwe n’umunyavyaha yagiriwe ubuntu nkamwe, akaba na mwene So musangiye intambara y’umusaraba, Balthasar Miburo
Bibliya ntivuga ko Filipo yabatije abantu kubera ko ar’umudiyakoni, ahubwo itwereka ko yabatije kubera ko yar’umuvugabutumwa. Uwu mwene Data yitwa Filipo “aramanuka, aja mu gisagara c’i Samariya, abamenyesha ivya Kristo. Abantu benshi bashira umutima ku vyo Filipo avuga… Ariko bizeye ubutumwa bwiza Filipo ababwiye bw’ubwami bw’Imana, n’ubw’izina rya Yesu-Kristu barabatizwa abagabo n’abagore (Ivyakozwe n’Intumwa 8: 5, 12).
Nta murongo dufise muri Bibliya werekana ko Filipo yabatije abantu kuko yar’umudiyakoni. Ariko kandi Bibliya ivuga ngo “Filipo, umuvuziw’ubutumwa bwiza, n’umwe wo muri ba bandi indwi (Ivyakozwe n’Intumwa 21: 8). Ariko kandi si we gusa, kuko hariho uwundi yabatije Paulo,amurambika ko n’ibiganza kugirango Mpwemu Yera amumanukireko, nkuko dusoma ngo: “ I Damasiko har’umwigishwa yitwa Ananiya; Umwami Yesu aramwiyereka, aramuhamagara, nawe ati Sabwe Mwami (Ivyakozwe n’Intumwa 9: 10), Uwu Ananiya niwe yatumwe na Yesu kubatiza “Sauli ariwe Paulo” (Ivyakozwe n’Intumwa 13: 9). “Ananiya aragenda, yinjira munzu, amurambika kw’ibiganza, aramubwira ati: “Sauli mwene Data, Umwami arantumye, niwe Yesu yakubonekeye mu nzira wazananye, ng’uhumuke wuzuzwe Mpwemu Yera… Uwo mwanya, ibisa n’ibikaragashi bimuva ku maso, arahumuka, ava hasi, arabatizwa (Ivyakozwe n’Intumwa 9: 17-18). Ni waba wasomye neza, wabonye ko Ananiya, ntiyari Intumwa, ntiyari n’umudiyakoni, ndetse ntiyari n’umuvugabutumwa, ariko handitswe ngo yari “umwigishwa” (Ivyakozwe n’Intuma 9: 10).
Ikindi tubonye n’uko uwu mwigishwa yiherewe ububasha n’Umwami Yesu ubwiwe, agashobora kubatiza Paulo no kumurambikakw’ ibiganza, Paulo agahabwa Mpwemu Yera. Uwu Mpwemu Yera Paulo yaherewe i Damasiko, biciye kuri Ananiya, niwe yakoresheje Paulo gushika ku rupfu rwiwe. Filipo yarabatije ariko biba ngombwa ko intumwa arizo ziza kurambika ibiganza ku bantu babatijwe, kuko vyari vyoroshe kuva i Yerusaremu ukaja i Samariya. Ariko Ananiya nawe vyabaye ngombwa ko akora vyose, arabatiza yongera ashira ibiganza kuri Paulo. Ntaco twobivugako, kuko « bitava ku kugomba kw’umuntu, canke ku gushimika kwiwe, ariko biva ku Mana igira ikigongwe »(Abaroma 9: 16). 
Hariho abantu benshi rero bamaze gufata ko ar’ingingo ntabanduka, yuko umupasitori ariwe ategerezwa kubatiza gusa. Ariko Yesu ashobora gutuma abantu bameze nka Filipo, bagakora igikorwa, aho ukuri kutaramenyekana. Ijambo ry’Imana ritweretse ko Filipo yabatije mw’izina ry’Umwami Yesu gusa, ariko Intumwa ni zo zaje kurambika abantu kw’ibiganza ngo bahabwe Mpwemu Yera. Aha biraboneka ko Filipo yar’afise ingabire, ariko iyo ngabire ikagira aho igarukira. Ariko Ananiya, we Yesu yamuhaye vyose mur’ako kanya, ndetse abanza kurambika ibiganza kuri Sauli, aza kumubatiza hanyuma. Ariko bose bari abasavyi ba Kristo. bakorera Umwami umwe, mw’ishengero rimwe. “Nkuko mu mibiri umwe dufise ingingo nyinshi, kandi ingingo zose zitagira igikorwa kimwe (Abaroma 12: 4).
Ikindi, ishengero rya mbere ntiryakorera ku rurutonde nk’urw’uyu musi rwazanywe  n’ubwenge bw’ab’isi. Naho ryari rigicuranguzwa n’abategetsi b’isi, abo mw’idini n’abanyaporitike, ryari iryera kandi Imana yararyishimira cane. Uko biri kwose, Ishengero rikwiye kugira gahunda rikorerako, nta kibanza kiriho c’abigenga, bikorana ukwabo nyene. Ariko abashoboye kurema ishengero,aho ritarashika, bakavuga rumwe na twebwe, kubagwanya si vyo na gatoyi, kuko “ Imana atar’iy’umuvurungano ariko n’iy’amahoro (1Abakorinto 14: 33). Ariko, ni waba usanzwe ufise ingabire ushaka gukoresha kugira ngo ishengero rya Kristu rikure, n’ubibwire bene Data bavyige babe aribo bavyemeza. Kandi bamwe yabahaye kuba intumwa, abandi abaha kuba abavugishwa nawe, abandi abaha kuvuga ubutumwa bwiza, abandi kuba abungere n’abigisha, kugirango abera babone gutungana, baheze babone igikorwa co kugabura ivy’Imana, bubake umubiri wa Kristu (Abanyefeso 4: 11-12)
Ku bapasitori n’abakuru b’ishengero, ndetse mbere n’ishengero ryose, dukwiye kwitondera ibintu bishobora gushika mu gikorwa c’Imana cane cane mur’ibi bihe vya nyuma. Ntidufate ingingo z’ikibiriraho, tutabanje kwihweza ngo tumenye niba koko atari Umwami Yesu yashatse ko ibintu bigenda gurtyo. Kukw’abashingira intahe Yesu, baba bavugishwa na Mpwemu (Ivyahishuwe 19: 10).
Niba habonetse umuntu akigisha abantu, akaba atagwanya ishengero, akereka abantu ukuri nkuko kuri muri Yesu, mukwiye kumureka agakorera Imana. Ni yaba yatumwe na Yesu, Mpwemu wa Yesu azoyobora abo bantu yigishije abereke ishengero bakwiye kwicaramwo; “ kukw’intambara atar’iyanyu, ariko n’iy’Imana” . Ni vyaba biturutse mu bantu bizosendwa, ariko ni vyaba biturutse ku Mana ntimuzoshobora kubatsinda, mwoye kuzosanga muriko murwanya Imana (2Ngoma 20: 15 n’Ivyakozwe n’Intumwa 5: 38-39). Imana ntizorinda gusaba uruhusha mw’ishengero kugira ngo ikoreshe abagabo n’abagore canke abasore n’abakobwa mu gihe bikenewe kandi vyihutirwa. Izotuma uwo ishaka gutuma kandi izoba ibonako abikwiye. Kukw’ivyimburwa ni vyinshi, ariko abimbuzi nibo bake. Nuko rero ni mwinginge Nyen’ivyimburwa arungike abimbuzi mu vyimburwa vyiwe (Matayo 9: 37-38). Mureke kwidoga ngo none nka kanaka ariko arigisha hariya ni nde yamutumye? Ahubwo genda mumufate mu mugongo, “kuko uwutar’umwansi wanyu ari mu ruhande rwanyu” (Luka 9: 48).
Nuko twese twunge ubumwe tugire umutima umwe, tugendere iri jambo ry’Umwami wacu ngo: “Nuko ni mugende muhindure amahanga yose abigishwa, mubabatiza mw’izina rya Data wa twese, n’iry’Umwana n’irya Mpwemu Yera, mubigishe kwitondera ivyo nabategetse vyose. Umve, ndi kumwe nmwe imisi yose, gushika ku muhero w’isi. Igihe kirashitse, ubwami bw’Imana buri hafi, mwihane mwemere ubutumwa bwiza” (Matayo 28: 19-20; Mariko 1: 15). Mw’izina ryera rya Yesu. Amen.
Publié dans:Non classé |on 3 mai, 2017 |Pas de commentaires »

Centre du Plein Evangile "L... |
For This Cause |
MON SAUVEUR M'AIME |
Unblog.fr | Créer un blog | Annuaire | Signaler un abus | piccole note di un cammino ...
| مع ا ...
| Blog du niveau intermédiaire